Ni byiza koza imbwa kugirango ihorane ubuzima bwiza, kuko mu kuyoza biyikuraho ivumbi yigaraguyemo kandi riba ribitse ubukoko bwinshi, ibisigazwa by'ibiryo n'ibyondo, ubwoya bwapfutse, ndetse n'impumuro ishobora kuzatera uruhu kwandura indwara zitandukanye. Koza imbwa buri gihe yanduye rero bituma uruhu rwayo rumera neza kandi rukagumana ubuzima ndetse n'ubwoya bugahora butoshye kandi bukomeye, budapfukagurika.

Inyungu ziri mu koza imbwa.

Gutuma uruhu ruhora rumera neza nta burwayi:
Koza imbwa bikuraho imyanda itandukanye nk'ivumbi n'ibyondo byiyometse mu bwoya no ku ruhu, iyo bitinzeho bishobora kubora bikabyara ubukoko bwatera uburwayi, kwishimagura n'ibindi byangiza uruhu, bityo itungo rikaba ryatangira kurwara.

Kurwanya impumuro mbi:
Koza imbwa biyitera kutanuka. Kenshi na kenshi aboroye imbwa muzi impumuro yayo igihe idaheruka koga. Ni byiza rero kuyigirira isuku kuko bituma itungo ryawe ridatera ipfunwe mu rugo hose cyangwa ngo ryinubwe.

Kongera umubano mwiza na Sebuja:
Imbwa yogeje ifite isuku, ubwayo ihorana akanyamuneza kandi iba ituje. Nta muntu uyinuba, yaba Sebuja (nyirayo) cyangwa abo mu rugo, usanga bafitanye umubano mwiza. Kabone n'iyo abashyitsi baje badakunda imbwa, ifite isuku ntibatera ikibazo.

Birinda gupfunyarara k'ubwoya:
Koza imbwa buri gihe, bifasha kwirinda ko ubwoya bwegerana cyane bugapfunyarara akenshi ku mbwa zifite ubwoya burebure, ari byo bishobora no kuyitera ibikomere n'ububabare ku ruhu rwayo.

Uburyo bwiza bwo koza imbwa na Dog Shampoo yabugenewe:

1. Imyiteguro

• Gushyira hafi Shampoo, n'uturindantoki uri bukoreshe
• Gutegura amazi adakonje kandi adashyushye cyane (akazuyazi)
• Kubanza guhanagura imbwa n'uburoso bukuraho ubwoya buba bwashaje cg bupfuka

2. Igikorwa cyo gutegura amazi yabugenewe

• Kubanza gufungura Shampoo muri ya mazi wateguye nibura mu ibesani iringaniye (10L)
• Bitewe n'umwanda imbwa yawe ifite wakoresha nibura ibiyiko 3 cg 4 bya RIVER^® Dog shampoo.
• Kuvangavanga amazi n'isabune kugeza igihe izanye ifuro, mbese irese neza.

3. Igikorwa cyo koza imbwa nyirizina

• Umaze kwambara uturindantoki, tangira woze imbwa uhereye ku ijosi umanuka kugera ku murizo, ugenda usiga isabune ivanze n'amazi, ukurikiza uko ubwoya buteye. Ukurikizaho amaboko n'amaguru n'utujanja. Ugasozereza ku mutwe, ariko witondera, amaso, amatwi n'amazuru. Aha nta mazi y'isabune agomba kujyaho. Ibyiza wanakoresha igitambaro kidafite amazi menshi usa nk'uhanagura.
• Mu gihe uri koza imbwa kandi ni ngombwa gukomeza kuyireba, uyivugisha, no kugenda uyishimashima mu buryo butayibabaza, (massage) ukamara akanya gato gato aho uri koza kugirango isabune yinjire neza mu bwoya kandi inakureho umwanda.
• Kurindira nibura iminota kuva kuri 3-5 bitewe n'ibyanditse kuri Shampoo, kugirango hizerwe ko imyanda yavuyeho.
• Nyuma y'ibi ukoresha amazi meza kandi menshi, wunyuguza aho wagiye ushyira isabune, kandi inshuro nyinshi kugirango nyuma imbwa itaza kwirigata ikaba yarya ku isabune yasigaye mu bwoya.
• Mu gusoza hakoreshwa igitambaro cyabugenewe, ugahanagura imbwa yawe neza, ukayireka ikajya ku zuba. Abafite akuma kumutsa umusatsi (Hair dryer / sèche-cheveux) nako wagakoresha ariko ku bushyuhe bukeya kandi ntiwegereze uruhu rw'imbwa cyane.

IBYO KWITONDERA:

• Kutoza imbwa incuro nyinshi:
  N'ubwo koza imbwa biri ngombwa, si byiza ko bikorwa kenshi cyane nk'umuntu, kuko byayitera kugira umwera bigatera uruhu rwayo gukanyarara. Ni byiza koza imbwa 1 mu cyumweru, niba imbwa yawe iba ahantu hayanduza cyane, cg ifite ibyoya birebire. Ubusanzwe 1 mu kwezi birahagije
• Kugendera ku myitwarire yayo:
  Imbwa yiyanduza cyane birumvikana, ariko nanone aho irara cyangwa yirirwa hagomba kugirirwa isuku. Ikindi bikanaterwa n'imiterere yayo: Hari imbwa zitandura cyane hari n'izandura cyane bitewe n'imiterere n'indeshyo by'ubwoya.
• Kudakoresha na rimwe Shampoo y'abantu: Isabune zagenewe koza mu mutwe ku bantu no ku mubiri ntizihuje ibizikoze (ibinyabutabire) mu buryo bwagenewe amatungo. Ni ngombwa rero gukoresha Shampoo yagenewe imbwa kuko itagira ingaruka mbi.
• Kugisha inama muganga w'amatungo:
  Imbwa yawe igize ibibazo bitewe no koga, cyangwa bitewe n'isabune wakoresheje, n'ibindi byose bigaragaza uburwayi, ihutire kwa muganga w'amatungo akugire inama, mbese muganire ku buzima bw'itungo ryawe.
• Kwisukurura no Gukaraba:  
  Usoje igikorwa cyo koza imbwa no kuyihanagura, ibuka kwisukurura no gukaraba intoki zawe neza.
• Kuyibika: 
  Shampoo yagenezwe koza imbwa ibikwa kure y'aho abana bagera, ni byiza kandi kutayegeranya n'aho ubika andi masabune kugirango hatabaho kwibeshya mu kuyikoresha ibyo itagenewe.

Umwanzuro:
RIVER^® Dog shampoo ni Shampoo yagenewe gusukura imbwa ziba mu bantu, bituma zitagira udukoko n'impumuro mbi. Isuku ni ngombwa kugeza ku matungo tubana nayo iwacu. Iyi Shampoo ariko nanone, ishobora no koza andi matungo ariko wabanje kubaza muganga w'amatungo. Hari ababana n'injangwe n'andi matungo mu nzu, bityo rero akwiye kugirirwa isuku ihagije. Akarusho k'iyi RIVER^® Dog shampoo kandi ni uko yujuje ibisabwa kandi ikaba ihendutse ku isoko ugereranyije n'iziva ahandi. 

Inkuru yateguwe na Clement Mukimbili
RIVER TRADING LTD
Yanditswe tariki ya 4/09/2025 isubirwamo 19/01/2026